Gayo Seni

Oleh: Yusradi Usman al-Gayoni*


Olok di nge mubah seni Gayo
Arap nge ara sarak opat
Gere ne mepat duduk tempate
Nge osop sari ni edet besilo
Gere te beteh kusi die
Enge lupe ken edet te

Olok di nge mubah seni Gayo
Mupakat gere ne mu keramat
Gere ne morom berde dele
Beta si sara ine pe
Gere ne sara tangke
Musara kekire

Olok di nge mubah seni Gayo
Sekiren kite erah orom kite timang
Gip mu beda orom masa sedenge
Reje gere ne musuket sipet
Munyuket nge ayung
Munimang gere ne timang

Olok di nge mubah seni Gayo
Imem gere ne mu perlu sunet
Ukum gere ne mu nukum
Edet gere ne mubeda
Benar nge bertegah
Asal salah nge berpapah

Olok di nge mubah seni Gayo
Petue gere ne mu sidik sasat
Tetue gere ne mepat
Nge makin jarang
Beluh sara sara
Asal seni nguk i bilang

Olok di nge mubah seni Gayo
Asal rayat nge makin simen
Nge masing masing
Ho lagu diri e
Beta isinen pe
Gere ne musara
Olok di nge mubah seni Gayo
Uken towa ken alat
Besengkeliten sabe diri
Besituloken
Sikut kuen kiri
Gere ne mu betehi diri

Olok di nge mubah seni Gayo
Ike jemen ara ilen sumang
Seni sumang gere ne mu tempat
Si gera penah ara i aran-aranen
Jema gere ne mukemel
Si ara mu nos kemel

Olok di nge mubah seni Gayo
Peri pe gere ne berabun
Cerak lepas nge kekuah
Deras lagu wih musoah
Buet gere ne mu paedah
Asal tingkah gere ne te perin

Olok di nge mubah seni Gayo
Dep seni beta pari e
Dele nge perubahen
Gere ne tekire
Makin puren
Kune die?


*Jalan Masjid Syuhada Pasar VI Gg. Putra Jasa No. 93B, Padang Bulan, Medan
13 Juni 2009 (19.30 – 20.33)