Nasib ni Urang Tue

Oleh: Yusradi Usman al-Gayoni*


Sayang di urang tue i Gayo besilo
Gere ne i rege i anak
Sentan i talu
Anak ongot gere mesut
Sawah mu pelo leng i rongok
Baro begerak ke nge sawah gerinem

Sayang di urang tue i Gayo besilo
Gere ne ara jarak
Ama ine lagu dengan, serinen atawa biak rakan
Anak i ejeri gere ne ken tawar
Si ara timul penyaruten
Enggeh gegurun

Sayang di urang tue i Gayo besilo
Tengaha tetue i bereti jema
Musirang si me mude musangka belem mu demu arap
Seni tetue nge kenyanyan
Remalan musirang sire petungkuk
Si beru bujang pe kedik sire be ha hoi wi

Sayang di jema tue i Gayo besilo
Perupuhen gere ne te kaji
Nge sempit bahan pe kurang
Si bebujang i tos gonjes nge lagu roh ni kude i lah ni belang
Beta si beberu pe wok i cet nge ijo ilang
Asal des ne lagu jin Paya Ilang

Sayang di urang tue i Gayo besilo
Sekiren i kontak
Anak pe meleng mien mujomeng
Asal ama ine gere maju
Asal kami gere maju win ipak
Tape kam kerah nge kemajun

Sayang di urang tue i Gayo besilo
Anak i ejeri, anak pe munungkah
Pumu pe sawah ine pe metuk jantungen
Anak pe melewen lagu jin manusie
I kini semiang ama ine pe jarang mu nungkuk
Patut nge rusak rasuk tamah karu denie
Sayang di urang tue i Gayo besilo
Munejeri anak gere ne serta
Ama mu nejer
Ine mu bela
Nge perangkam sabe diri gara gara anak
Sawah mu pisah gere ne te semet

Sayang di urang tue i Gayo besilo
Munentamen dede mudoleten eleh si pit
Ine pe nyebut gere rede rede
Lah kena gere menyang rayoh
Asal ke nge olok tu pe
Udah di ku Datu Beru pari e

Sayang di urang tue i Gayo besilo
I kuduk nama ine reta i garalen
Meh umah empus orom ume
Jema tue pe metuh sakit
Nge mate beden
Entah aherat entah denie

Sayang di urang tue i Gayo besilo
Gere sangup nangung kemel
Mulangkahen kedeng munemah unang
Meh umur singkih kuen
Tanoh cak ken bantal i tanom ku bumi
Mayo ku Gayolinge orom Serambi

Sayang di urang tue i Gayo besilo
Atan tete ine mongot pesinguk
Munamuren lauh si remenang
I atas ni lepo ama pe sesuk pejejik
Pebening sire ongot peberguk
Beta ke nge denie


*Jalan Masjid Syuhada Gg. Putra Jasa No. 93 B, Pasar VI, Padang Bulan, Medan
14 Juni 2009 (15.30 – 16.00)