Kekeber ni Gayo

Oleh: Yusradi Usman al-Gayoni*


Ini kekeberen pengen ku cerite
Gelah rap keti terang terang
Urang Gayo nge i Acih ni belem masehi
Belem geh si bedagang

Renye ara kerajaen
Linge gerele
Adi Genali bobon ken reje
Munemah ulu mungunuli ampang

Selain Adi Genali
Kik betul si beteh jema
Atawa tengku kawe tepat kene urang Acih ni
Asal oya enge terang

Adi genali
Reje bijaksana
Adil munimang
Beta wan buet pe

Waktu oya asal sarak tulu kedah
Ara reje, petue orom rayat
Imem pe mutamah pas Islam sawah
Oya keti puren mujadi sarak opat

Ari Linge munyebar keturunen
Ara si mu nuntut ilmu
Deba mi mungenal penurepen
Tengku Merah Johan ku Cot Kala berguru

Cot Kala ni dayah pertama ara
Seh Abdulllah Kan’an ken guru sekaligus ulama
Mu nejer Islam ku tengku a
Sawah semperne i rasa

Merah Johan ni jema e pane
Lagu ama e i nenggeri Linge
Becerak lemut mampat rupe e
Mersik muilmu pane munanto ate


Pemarin we i angkat ken panglime
Menyebar ni Islam i Acih
Asal waktu oya Hindu ilen si delen ne
Rayat gere mu ilmu gere mu beteh

Terakhir pecah perang
Merah Johan nemah ulu
Pasuken ni tengku ni pe renye menang
Pemarin kerajaen i Acih ni renye bersatu

Musara wan keseltanen
Keseltanen Aceh Darusalam gerel e
Kute Reje ken puset te
Merah Johan pertama ken seltan

Merah Silu pe mujadi reje
Kerajaen Malikussaleh nge terpanang
Oya nge nyata i akuie denie
Ari pudaha ku besilo nge makin terang

Beta Iskandar Mude pe
Mejadi Seltan i keseltanen Acih
Munatengen marwah nacih
I kenang sawah besilo

Reje Linge penah ken panglime perang
Asal perintah ni seltan waktu oya
Gere mudaleh reje ne
Asal nge beta sipet te

Mujadi wakil i kerajaen Johor
Mu mimpin perang mujege Malaka
Mulo mah jelen sawah meh umur
Oya keti seni ara nenggeri Lingga

Datu Beru pe asal simen
Belem ara len hakim jema banan
We nge mulo munemah langkah
Mujadi hakim i keseltanen Acih

Mu ninget Datu Beru ken manat ni ama e
Murip benar mati suci
Salah bertegah
Benar berpapah

Mutus pekara urum ate bengi
Cerak ke misi pedi
Bijak mampat belangi
Mu ilmu tamah mien berani

Cerite ni Datu Beru mu tali ku Gajah Putih
Asal musehur pedeh i Acih
Sengeda orom Bener Meriah si ken kunci
Cik Serule bijak penadi

Gajah Putih sabe kite kenang
Gere penah lupen ari ingeten
Gajah Putih seni jadin ken lambang ni kodam
Bobon mien ken gerel ni perguruen tinggi

Gere perlu kite kemel ken sejarah te
Kena gere ilen kite uke
Gelah mu betehi diri orom Tuhen te
Kena kite keturunen reje, tengku orom pang

Dele ilen si mele ku rike
Si penting enti sawah lupe kite ken dirin te
Kena oya retan te
Terutama kite seni si me mude


*Jalan Masjid Syuhada Gg. Putra Jasa No. 93B, Padang Bulan, Medan
03.50-03-55 (14 Juni 2009)